Օրը սկեցինք ագարակից: Այնտեղ ընկեր Էդմոնից ստացանք մեր աաջադրանքները և անցանք գործի: Ագարակում ջրեցինք ծառերը, այգեգործական աշխատանք կատարեցինք, մաքրեցինք տարածքը մոլախոտերից և անգամ օգնեցինք լողացնել ձիերից մեկին:
Ժողովրդական օպերայի պարապմունքին կրկնեցինք մեր անցած երգերը և պարերը: Աշխատեցինք թերությունների վրա՝ փորձելով ավելի ճիշտ ներկայացնել սովորածը:
Ընկեր Մարիետին հանդիպեցինք Արևմտյան դպրոցի բակում: Մաքուր օդին քննարկեցինք Կարել Չապեկի փոքրիկ առակների վերլուծությունը: Ինձ համար շատ հետաքրքիր էր լսել մյուսների կարծիքը առակների մասին: Այդ փոքրիկ առակներն այնքան խորը ենթատեքստ էին պարունակում իրենց մեջ, որ յուրաքանչյուր առակ կարողանում էինք դիտարկել տարբեր տեսանկյունից: Ընկեր Մարիետի հետ առակների բուռն քննարկումից հետո շտապեցինք լողի պարապմունքի:
Ամառային շոգ օրերին իսկական հաճույք է լողավազանում գտնվելը: Հատկապես երբ արդեն զգում ես, որ քեզ մոտ ստացվում է լողալ:
Լողի պարապմունքից հետո ընկեր Տաթևի հետ քննարկեցինք արտագնա ճամբարի հետ կապված մի քանի հարցեր: Խոսեցինք երթուղու, ճաշացանկի, անհրաժեշտ պարագաների մասին: Քննարկեցինք նաև վաղվա օրվա մեր անելիքները:
Մարիամ Խաչատրյան 